ആലപ്പുഴ: മലയാള മനോരമയുടെ സാഹിത്യ-സാംസ്കാരിക വേദിയായ മനോരമ ഹോർട്ടസിന്റെ ഭാഗമായി പ്രശസ്ത യുവ സാഹിത്യകാരൻ അഖിൽ പി. ധർമ്മജനുമായി സംവാദം സംഘടിപ്പിച്ചു. മലയാള മനോരമ ഭാഷാപോഷിണിയും ആലപ്പുഴ സനാതന ധർമ്മ കോളേജിലെ മലയാള വിഭാഗവും സംയുക്തമായാണ് പരിപാടി സംഘടിപ്പിച്ചത്.
2026 നവംബർ 18-ന് രാവിലെ 10 മണിക്ക് കോളേജ് ഓഡിറ്റോറിയത്തിൽ നടന്ന പരിപാടി വിദ്യാർത്ഥികൾക്ക് സാഹിത്യലോകവുമായി നേരിട്ട് സംവദിക്കാനും സർഗാത്മക രചനകളുടെ സാധ്യതകൾ അടുത്തറിയാനും അവസരമൊരുക്കി.
കോളേജ് പ്രിൻസിപ്പൽ പ്രൊഫ. (ഡോ.) വി. ആർ. പ്രഭാകരൻ നായർ പരിപാടി ഉദ്ഘാടനം ചെയ്തു. മലയാള വിഭാഗം അധ്യക്ഷ പ്രൊഫ. (ഡോ.) സിന്ധു അന്തർജനം അധ്യക്ഷത വഹിച്ചു. മലയാള മനോരമ പ്രതിനിധി കിച്ചു കൃഷ്ണൻ സ്വാഗതം ആശംസിച്ചു.
‘കവികൾക്കപ്പുറത്തേക്ക്… കഥാകാരനൊപ്പം…’ എന്ന ആശയത്തെ മുൻനിർത്തി നടന്ന സംവാദത്തിൽ അഖിൽ പി. ധർമ്മജൻ വിദ്യാർത്ഥികളുമായി തന്റെ സാഹിത്യാനുഭവങ്ങളും എഴുത്തിന്റെ വഴികളും പങ്കുവെച്ചു. സാഹിത്യരചനയുടെ വിവിധ തലങ്ങൾ, കഥപറച്ചിലിന്റെ സവിശേഷതകൾ, സമകാലിക സാഹിത്യത്തിലെ പ്രവണതകൾ തുടങ്ങിയ വിഷയങ്ങൾ സംവാദത്തിൽ കടന്നുവന്നു. വിദ്യാർത്ഥികളുടെ ചോദ്യങ്ങൾക്കും സംശയങ്ങൾക്കും അദ്ദേഹം മറുപടി നൽകി.

Previous


